ພື້ນຖານການຊື້ຂາຍ
ເປັນຫຍັງຊື້ແບບ Market ແລ້ວໄດ້ລາຄາແພງກວ່າທີ່ເຫັນ: spread, ຄວາມເລິກ order book ແລະ slippage
ລາຄາໃຫຍ່ເທິງໜ້າຈໍແມ່ນລາຄາຊື້ຂາຍຫຼ້າສຸດ ບໍ່ແມ່ນລາຄາທີ່ທ່ານຈະໄດ້. ເບິ່ງຕົວເລກຈິງຈາກ order book ວ່າງົບ 5,000 ແລະ 50,000 USDT ເສຍ slippage ຈັກ % ໃນຄູ່ໃຫຍ່ ແລະ ຄູ່ບາງ, ແລະ ສິ່ງທີ່ຄວນກວດກ່ອນກົດ Market.
ກົດ Buy ແບບ Market ແລ້ວ ລາຄາສະເລ່ຍທີ່ໄດ້ສູງກວ່າຕົວເລກໃຫຍ່ທີ່ເຫັນເທິງໜ້າຈໍ ຫຼື ໄດ້ຫຼຽນໜ້ອຍກວ່າທີ່ຄິດ—ສ່ວນຫຼາຍບໍ່ແມ່ນລະບົບຜິດພາດ. ຕົວເລກໃຫຍ່ນັ້ນເປັນລາຄາ ທີ່ມີຄົນຊື້ຂາຍກັນຫຼ້າສຸດ, ບໍ່ແມ່ນລາຄາທີ່ຮັບປະກັນໃຫ້ທ່ານ. ລາຄາທີ່ທ່ານໄດ້ແທ້ ຂຶ້ນກັບສາມຢ່າງ: ຊ່ອງຫ່າງລາຄາ (spread), ຄວາມເລິກຂອງ order book ແລະ ຂະໜາດຄຳສັ່ງຂອງທ່ານທຽບກັບຄວາມເລິກນັ້ນ.
ຕົວເລກໃນບົດນີ້ຄິດຈາກ order book ສາທາລະນະຂອງ Binance ເວລາ 06:16 UTC ວັນທີ 12 ຕຸລາ 2026 (ຂໍ້ມູນສາທາລະນະ ທີ່ເບິ່ງໄດ້ໂດຍບໍ່ຕ້ອງມີບັນຊີ). ຕະຫຼາດປ່ຽນທຸກວິນາທີ ຕົວເລກຈຶ່ງໃຊ້ເພື່ອສະແດງຂະໜາດຂອງຜົນກະທົບ ບໍ່ແມ່ນຄ່າທີ່ທ່ານຈະໄດ້ພໍດີ. ຫຼັກດຽວກັນໃຊ້ໄດ້ກັບທຸກຕະຫຼາດທີ່ມີ order book.
ລາຄາທີ່ເຫັນ ກັບ ລາຄາທີ່ຊື້ໄດ້ ແມ່ນຄົນລະຕົວເລກ
ໃນ order book ມີສອງຝັ່ງ:
- ຝັ່ງຂາຍ (ask, ສີແດງ, ຢູ່ເທິງ): ລາຄາທີ່ຄົນອື່ນຕັ້ງຂາຍລໍໄວ້. ເວລາທ່ານຊື້ແບບ Market, ທ່ານຊື້ຈາກຝັ່ງນີ້ ເລີ່ມຈາກລາຄາຕ່ຳສຸດ.
- ຝັ່ງຊື້ (bid, ສີຂຽວ, ຢູ່ລຸ່ມ): ລາຄາທີ່ຄົນອື່ນຕັ້ງຊື້ລໍໄວ້. ເວລາທ່ານຂາຍແບບ Market, ທ່ານຂາຍໃສ່ຝັ່ງນີ້ ເລີ່ມຈາກລາຄາສູງສຸດ.
ຊ່ອງຫ່າງລະຫວ່າງລາຄາຂາຍຕ່ຳສຸດ ກັບ ລາຄາຊື້ສູງສຸດ ເອີ້ນວ່າ spread. ຜົນທີ່ຕາມມາໂດຍກົງ: ຖ້າຊື້ແລ້ວຂາຍຄືນທັນທີ, ທ່ານເສຍປະມານ spread ໜຶ່ງເທື່ອ ກ່ອນຈະນັບຄ່າທຳນຽມ.
ຄູ່ທີ່ຄົນເທຣດໜ້ອຍ: ແຕ່ລະຂັ້ນລາຄາມີຂອງໜ້ອຍ
ຮູບນີ້ແມ່ນ DCR/USDT ທີ່ມີການຊື້ຂາຍໃນ 24 ຊົ່ວໂມງປະມານ 200,000 USDT. ສັງເກດຖັນ Total (ມູນຄ່າເປັນ USDT ຂອງແຕ່ລະຂັ້ນ): ລາຄາຂາຍຕ່ຳສຸດ 16.68 ມີພຽງ 120 USDT; ຂັ້ນອື່ນສ່ວນຫຼາຍມີຫຼັກຮ້ອຍ ເຖິງ 2,000 ກວ່າ USDT. ຖ້າທ່ານຊື້ຫຼາຍກວ່ານັ້ນ, ສ່ວນທີ່ເກີນຈະໄປຈັບຄູ່ກັບຂັ້ນລາຄາສູງຂຶ້ນເທື່ອລະຂັ້ນ. ນັ້ນຄື slippage: ລາຄາສະເລ່ຍທີ່ໄດ້ ສູງກວ່າລາຄາຂາຍທຳອິດ.
ທຽບກັບ BTC/USDT ທີ່ມີການຊື້ຂາຍວັນລະປະມານ 700 ລ້ານ USDT: ລາຄາຊື້ ແລະ ຂາຍຫ່າງກັນພຽງ 0.01 USDT ແລະ ຂັ້ນດຽວອາດມີຫຼາຍແສນ USDT ລໍຢູ່.
ຊື້ດ້ວຍງົບເທົ່າກັນ ໃນຄູ່ຕ່າງກັນ: ຕົວເລກຈິງ
ຂ້າງລຸ່ມແມ່ນຜົນທີ່ຄິດຈາກ order book ຈິງໃນເວລາດຽວກັນ: ຖ້າຊື້ແບບ Market ດ້ວຍງົບຕາມແຖວ, ລາຄາສະເລ່ຍຈະສູງກວ່າລາຄາຂາຍທຳອິດຈັກ % ແລະ ກິນໄປຈັກຂັ້ນລາຄາ.
| ຄູ່ | spread | slippage ເມື່ອຊື້ 5,000 USDT | slippage ເມື່ອຊື້ 50,000 USDT |
|---|---|---|---|
| BTC/USDT | 0.01 USDT (~0.00001%) | ~0% (1 ຂັ້ນ) | 0.001% (19 ຂັ້ນ) |
| ADA/USDT | 0.04% | 0.006% (2 ຂັ້ນ) | 0.04% (3 ຂັ້ນ) |
| KSM/USDT | 0.19% | 0.22% (3 ຂັ້ນ) | 2.65% (29 ຂັ້ນ) |
| DCR/USDT | 0.18% | 0.08% (5 ຂັ້ນ) | 4.73% (108 ຂັ້ນ) |
ສິ່ງທີ່ຕາຕະລາງບອກ:
- ງົບນ້ອຍ ເກືອບບໍ່ມີ slippage ແມ່ນແຕ່ໃນຄູ່ບາງ: ໃນເວລາດຽວກັນ ຄຳສັ່ງ 50 ແລະ 500 USDT (ບໍ່ໄດ້ສະແດງໃນຕາຕະລາງ) ຖືກຈັບຄູ່ໝົດໃນຂັ້ນທຳອິດທັງສີ່ຄູ່. ສຳລັບງົບນ້ອຍ, ສິ່ງທີ່ເສຍແທ້ຄື spread.
- slippage ໂຕຂຶ້ນໄວເມື່ອງົບເກີນຄວາມເລິກ: DCR ຈາກ 0.08% ທີ່ 5,000 USDT ກາຍເປັນ 4.73% ທີ່ 50,000 USDT. ຄິດເປັນຫຼຽນ: ຖ້າໄດ້ລາຄາ 16.70 ທັງໝົດ ຈະໄດ້ປະມານ 2,994 DCR, ແຕ່ລາຄາສະເລ່ຍຈິງ 17.49 ໃຫ້ພຽງປະມານ 2,859 DCR—ຂາດໄປປະມານ 135 DCR ຫຼື ເກືອບ 2,260 USDT.
- ຄູ່ໃຫຍ່ບໍ່ໄດ້ຟຣີ: ທຸກຄູ່ຍັງມີຄ່າທຳນຽມຊື້ຂາຍເພີ່ມອີກ (ວິທີຄິດຄ່າທຳນຽມ Spot).
ກ່ອນກົດ Market: ກວດ 4 ຢ່າງນີ້
- ເບິ່ງ spread: ເອົາລາຄາຂາຍຕ່ຳສຸດ ລົບ ລາຄາຊື້ສູງສຸດ ແລ້ວຫານດ້ວຍລາຄາ. ໃນຕາຕະລາງຂ້າງເທິງ BTC ແລະ ADA ມີ spread ບໍ່ເຖິງ 0.05%, ສ່ວນ KSM ແລະ DCR ປະມານ 0.2%. ຖ້າຊື້ແລ້ວຄິດຈະຂາຍໄວ, spread ຄືຕົ້ນທຶນທີ່ເສຍແນ່ນອນແຕ່ຕົ້ນ.
- ນັບຄວາມເລິກຝັ່ງທີ່ຈະກິນ: ຊື້ໃຫ້ເບິ່ງຝັ່ງແດງ, ຂາຍໃຫ້ເບິ່ງຝັ່ງຂຽວ. ບວກຖັນ Total ຈາກຂັ້ນໃກ້ສຸດຂຶ້ນໄປ ຈົນເທົ່າງົບຂອງທ່ານ—ຂັ້ນທີ່ໄປຮອດ ຄືລາຄາສຸດທ້າຍທີ່ທ່ານອາດຈ່າຍ.
- ຖ້າງົບໃຫຍ່ກວ່າຫຼາຍຂັ້ນ, ໃຊ້ Limit: Limit order ກຳນົດລາຄາສູງສຸດທີ່ຍອມຈ່າຍ; ສ່ວນທີ່ບໍ່ມີຄົນຂາຍໃນລາຄານັ້ນຈະລໍຢູ່ ແທນທີ່ຈະໄລ່ຊື້ແພງຂຶ້ນ. ຄວາມຕ່າງຂອງສອງແບບນີ້ ເບິ່ງ Market Order ກັບ Limit Order.
- ແບ່ງຄຳສັ່ງ: ຄູ່ບາງ ຖ້າແບ່ງຊື້ເປັນຫຼາຍຄັ້ງ ແລະ ໃຫ້ເວລາຄົນຕັ້ງຂາຍໃໝ່ ມັກໄດ້ລາຄາສະເລ່ຍດີກວ່າກິນທີດຽວ—ແຕ່ລາຄາອາດເໜັງຕີໃນລະຫວ່າງນັ້ນ, ບໍ່ມີວິທີໃດຮັບປະກັນ.
ຊື້ແລ້ວ ຢາກຮູ້ວ່າໄດ້ລາຄາເທົ່າໃດແທ້
ເປີດ Order History ຫຼື Trade History: ຄຳສັ່ງ Market ໜຶ່ງອາດມີຫຼາຍແຖວ ເພາະຖືກຈັບຄູ່ຫຼາຍຂັ້ນລາຄາ. ເອົາ ຍອດ USDT ທີ່ຈ່າຍທັງໝົດ ÷ ຈຳນວນຫຼຽນທີ່ໄດ້ທັງໝົດ = ລາຄາສະເລ່ຍ. ທຽບກັບລາຄາຂາຍທຳອິດທີ່ທ່ານເຫັນກ່ອນກົດ ກໍຮູ້ slippage ຂອງຕົນເອງ. ຢ່າລືມວ່າຫຼຽນທີ່ເຂົ້າກະເປົາ ຖືກຫັກຄ່າທຳນຽມແລ້ວ—ວິທີອ່ານຈຳນວນ ແລະ ສະກຸນໃນຄູ່ ເບິ່ງ ອ່ານຄູ່ເທຣດ A/B ແລະ ເງິນທີ່ຈ່າຍແທ້.
ກວດຄູ່ທີ່ທ່ານສົນໃຈເອງ ໂດຍບໍ່ຕ້ອງມີບັນຊີ
ເປີດໜ້າເທຣດຂອງຄູ່ນັ້ນ (ເບິ່ງ order book ໄດ້ໂດຍບໍ່ຕ້ອງລັອກອິນ) ແລ້ວເບິ່ງຝັ່ງຂາຍສີແດງ: ບວກຖັນ Total ຈາກລາຄາຕ່ຳສຸດຂຶ້ນໄປທີລະແຖວ ຈົນເທົ່າງົບຂອງທ່ານ. ຖ້າຕ້ອງບວກຫຼາຍສິບແຖວ ຫຼື ລາຄາແຖວສຸດທ້າຍຫ່າງຈາກແຖວທຳອິດເກີນກວ່າທີ່ທ່ານຍອມຮັບໄດ້, ຄູ່ນັ້ນບາງເກີນໄປສຳລັບຍອດຂອງທ່ານ—ໃຊ້ Limit ຫຼື ແບ່ງຄຳສັ່ງແທນ. ຖ້າຂາຍ ໃຫ້ເຮັດແບບດຽວກັນກັບຝັ່ງຊື້ສີຂຽວ.